يا راكبن من عندنا فوق نيسان ( قصيدة وشيلة )

يا راكبن من عندنـا فـوق نيسـان
كنـه خفيـق الطيـر حـزة مهـده
يمـد مـن بيـن القشيعيـن وابـان
والعصر مـن دون الجلاميـد حـده
يمضي تقول انه يرفـرف بجنحـان
فيه الصلابـه مـا عسيـرن يـرده
رفارفـه كنـه صواميـد صفـيـان
قبـل النجايـع بالصيانـه مـشـده
والزيت والبنزيـن وافـي ومليـان
وكـل التلاحيـق البنـادق وعــده
يصبر على العجفات في كل الازمـان
ما يثنيـه جـور الطريـق ومكـده
فيه التحمل يمشـي بقـوة حصـان
لا غـرز برملـن ولا السـيـل رده
اليا ضواه الليـل مـن دون ضلعـان
تـوارا فيهـا صاحبـه مـا يـلـده
راعيه قرمن في هوا الطير شفقـان
راعي ولع صيـد الحبـاري يـوده
وان ما لقـا برقـا تعبـر بسمقـان
طيره هـذاك الزيـن حـرن نعـده
طيرن يخلي صاحي الخرب خيشـان
يسطـه بكفـن طـريـرن مـقـده
يبذ ريشـه فـي مطاميـن ريضـان
ما حسورت حالـه رداتـن وسـده
ياللي دهلت البيد مـا شفـت ذيبـان
ما هوب من شرق الجزيـره وجـده
رجال نجدي كنـه الذيـب سرحـان
حاف الفيافـي والبطـا مـا يسـده
تشوف طيره شايله فـوق الامتـان
كنه خفير الجيش مـن فـوق قـده
تراان بغيت العرف فاحرص يابو فلان
عرفه ترا يـا فـلان فيـه المـوده
صعلن شميطن بين الاقـراب ديقـان
فيـه السموحـه بالمزايـح وجـده
راعـي سواليفـن ونيسـه وقيفـان
ينزل على عثعـث ولا يريـد صلـده
لبصر طخاتـن مستبينـه بالاكـوان
يزبن على غـارن بشوحـة مصـده
يا زينهـا لسمـرت فيهـا الامـزان
في خايعن ارضه من الريف جـرده
في مبتدا الوسمي على جروف سنفان
سيله عيـارن مـن بعيـدن ممـده
يفرش على المرباع نقدن وحـوذان
ريحه عطيرن يشـدي لريـح نـده
تظهر نواويـرن علـى كـل ميـدان
وتوالـت سنيـن الحيـا مستجـده
دنيـا تعقبنـا حـلاهـا بنسـيـان
تسقينـا بامـراره وهـي مستبـده
ما له صحيبن لو حكت لك بالايمـان
طبع الغـدر فيهـا وهـي مستعـده
يالله عفـوك يتبعـه دوم غـفـران
وبجنـة الفـردوس روحـي تـرده




وهذه شيلة للقصيدة بصوت أبو ناصر

http://file8.9q9q.net/Download/54493794/---------.rm.html