قصيدة في الشاص 2002

من طرف **ابو ابراهيم** الجمعة أبريل 18, 2008 12:45 pm

يالعن ابوه الشاص الالفين واثنيـن=عـز الله إن المبدعيـن أبدعوبـه

تساعدوا في صنعه أطلق خبيريـن=باشـراف عالـم مبتـداه ابتدوبـه

برافسـورٍ مختـرع لـه براهيـن=فعله حصانه عن خطـاه ورسوبـه

حصل شهادة علم مع خبرة سنيـن=وله جايزة نوبل زمـان محسوبـه

من عائلـه بالعلـم دايـم ملميـن=تالايخـهـم بالعـلـم توارثـوبـه
أبـوه يابانـي سياسـي قوانـيـن=في دولته يصـدر نظـام العقوبـه

والأم نـازيـة موالـيـد برلـيـن=وخوال خاله مـن مواريـث كوبـه

صحيح ناقص لأن ماهو على الدين=عالم وعلمـه مـا يكفـر ذنوبـه

أما اختراعاته على الراس والعيـن=يشكر على أفكاره ودقـة أسلوبـه

اصخر بصنع الجيب من قبل عامين=بالسر حتـى دولتـه مـا دروبـه

لين انتجه وانتاجه أزين من الزيـن=رغـم اختـراع الغـرب تفاجؤبـه

من جودته له بالصحافـة عناويـن=بالسوق ربح كـل مـن تاجروبـه

رجـح موازيـنٍ وهبـط موازيـن=كل الـدول بالبورصـة ساهموبـه

نزل من الـدولار بالسعـر ثلثيـن=ودعم رصيد اليـن نوبـه ونوبـه

لاندالكروز اللـي تعشقـه ملاييـن=قبـل يجـي للشـرق تباشـروبـه

من دولته جابـه وكيلـه بتأميـن=لدولـة آل سعـود ملفـاه دوبــه

أسعد نفوس الـي لرؤيـاه شفقيـن=وكـلٍ دعالـه بالجـزا والمثوبـه

آباصفه كله مـن يسـار ويميـن=لو إن في وصفـه عليـه صعوبـه

بين كما ابو الهول مبنى الفراعيـن=كله حجـر مابـه حديـده وطوبـه

وبين المواتر سكبته تجلـي البيـن=سكبة زعيم ومحتفل فـي خطوبـه

واللون بيج وبويتـه مـن بلاتيـن=ضد الحـرارة والهـواء والرطوبـه

وحمار خطه مثـل سيـل البراكيـن=والا حمار الشمس حـزة غروبـه

وكبوته أنحف من حجم بديه شويـن=ورفارفـه متناسقـة مـع جنوبـه

ونظام دفع الحركـة دفـع تربيـن=فريد مـن نوعـه وهـم طوروبـه

وماطور صماماته أربع وعشريـن=وبخاخ مصروفـه يقنـن شروبـه

وتحضيرتين أمام وخلاف عكسيـن=وستة عشر جنطه على قـد هوبـه

ومساعـدات أربـع وقـدام ياييـن=ودفرنس وفريـول يحـرك كعوبـه

وكوابح أي بي اس تعمـل نظاميـن=وبكـل هـوبٍ للكوابـح انبـوبـه

وونشين سحب ويسحبن وزن طنين=وهزاز يمنـع بالصحـاري نشوبـه

وحمولته بالكيلـو الفيـن والفيـن=على الشدايد فيـه عـزم وصلوبـه

من قوته يصبر على الزين والشين=الطقـس ماهمـه جليـده وشوبـه

متعـدد الأغــراض للاتجاهـيـن=مافيه عيب أقـول ذا مـن عيوبـه

لاقفى مكوكٍ كـل طقمـه مفاديـن=علم الكواكـب والفضـاء كلفوبـه

ولا أقبل كما الجاكوار والا السقستين=في وقت غـارة والعـدو ولعوبـه

ولا اعرض شهابٍ مرسلٍ للشياطين=ضرب غلاف الجو واحدث شبوبـه

منوة غريبٍ شـف بالـه بعيديـن=الدرب لـو طـول بسرعـه يلوبـه

ما يمنعه لا رمل لا احجار لا طيـن=غريب ما تمشي المواتـر دروبـه

وان قلت للسواق يالاخو من ويـن=يعطيك علم أرضٍ قفر مـا وطوبـه

ما هو زمالة عايـلات ووراعيـن=ولا هو زمالـة للعفـون وجلوبـه

سلعـة ثمينـة للرجـال الثمينيـن=راع الولع يشريه لـو بـاع ثوبـه

لو أملكه لـو قيمتـه كلهـا ديـن=أهديـه للـي بالكـرم مجـدوبـه

لو إن ما هـو بحاجـةٍ للمعاويـن=لا شك من قدره لا أعنيـه صوبـه

يستاهله سلطان نسـل السلاطيـن=شيـخٍ رجـال العـرف تشرفوبـه

سلطان سلطان السخـاء للملفيـن=سلطان سلطان السعد لا اعتزوبـه

له هيبةٍ تخلـف عقـول المعاديـن=وله سمعةٍ لأغلى المعاني جذوبـه

يمناه غيـثٍ للضعـوف المساكيـن=غيثٍ حقـوقٍ مـا تحـرك هبوبـه

شهـمٍ كريـمٍ وافــيٍ للوفيـيـن=قـدوة وكـل الطيبيـن اقتـدوبـه

محصنٍ بالساس والطيـب تحصيـن=مصيون عن درب الردى ما حكوبه

يحمل شعار العز بـأول وهالحيـن=من شجرة آل سعود رمز العروبـه

شقران أبوه أللي على العسر واللين=سـمٍ جميـع الشعـب تفاخروبـه
شمـر خوالـه ملحقيـن المخليـن=يوم الحرايـب خصمهـم ضيقوبـه

سلطان بن محمد ونعـم المسميـن=ومرقاه مـا كـل النشامـا رقوبـه

سلطان ابو نايف سلالـة كريميـن=حرٍ ما خيـب هقـوة الـي هقوبـه

للمجد في حضرة سمـوه نياشيـن=وللشعر في مدحه مـذاق وعذوبـه

حافظ على تراث الرجـال القديميـن=لاحياه ينفق سيـدي مـن جيوبـه

للجيش شخصه من أشـد المحبيـن=من الأصايل كسبه أغلـى ركوبـه

واسطبله الأزرق علـم بالمياديـن=ما قيـل خيلـه بالسبـاق مغلوبـه

اعجاز بالانجـاز حسـب القوانيـن=احرازه لسـت الجوايـز اعجوبـه

اهذي طموحات الرجـال الشريفيـن=للـي سنـام العاليـات اعتلـوبـه

والجيب سلـع للرجـال الثمينيـن=ولو هو معي والله لا اعنيه صوبـه

وختامها يعيـش نسـل السلاطيـن=سلطان سلطان السعد لا اعتزوبـه

وصلوا على محمـد نبـي الثقليـن=اللـي هـداه المومنيـن اهتدوبـه