عذابي يالجبن

جبت لكم اليوم .. فطيرة الخضروات بالجبن .. أو مثل مايسمونها Vegetable Quiche

وه ! يا عذابي يا أنا ..

نبتدي بالمغادير على طوووول :



عجينة لعمل الفطيرة * مقاديرها في الأسفل
1/2 كوب بصل مقطع
1/2 كوب هليون (asparagus ( ، أو فاصوليا أو بصل أخضر ( اللي تبي .. ولايردك الا جيبك )
1/2 مشروم مقطع شرايح
1/2 طماط مقطع مربعات .. أو على شكل شبه منحرف >> بلا ملاغة .. طيب
1 كوب جبنة شيدر مقطع شرايح ..
جزرة وحدة مقطعة بزاوية درجة انحرافها 120 درجة >> كني بتكفخ
كوب ونص كريمة سااااائله
3 بيضات
1 ملعقة شاي ملح
ربع ملعقة شاي فلفل أسود
رشة من بهارات ايطالية ( اللي مايبي مو لازم .. محد جبركم )



الطريغة :

اسدحوا العجينة بعد ماتجهز .. وقلنا لكم مقاديرها تحت .. لحد يسأل .. ايه .. اسدحوا العجينة في قالب 9 انش .. مدهون طبعاً ..



مع شوية زيت زيتون .. اخلطوا الخضروات كلها على النار .. لحد ما تذبل شوية بس ..



حطوا الشسمة فيذاك >> يقالها خبيرة في الشرح




وه وه وه !!

اخلطوا البيض والكريمة والملح والبهارات الايطالية ( قلنا لكم منتوا مجبورين تحطونها ) ونصبه على العجينة ..

ونحط سالف الذكر .. طويل العمر .. فوق الخليط ..



ولمدة 50 دغيغة .. على حرارة 175 فهرنهايت .. يصير لنا كذا ..



يا عذابي يا أنا .

::






ايه نسيت مقادير العجينة ..

شفت الجبن وذبت ..



في الخلاط .. أو العجانة .. نخلط
كوبين ونص طحين + 1 ملعقة شاي ملح + 1 ملعقة شاي سكر
بعدها نضيف 1 كوب زبدة ( باردة ) مقطعة مربعات وتخلط لمدة 15 ثاني لكي لاتفقد الزبدة البرودة وتسيح أكثر من اللازم . .
ثمن نضيف ربع كوب ماء ( بارد ).. أو نص كوب حسب العجينة .. بالتدريج ..
يجب أن لاتزيد مدة خلط العجينة عن 30 ثانية ! شفتوا السرعة !




وبث ..

وعوافي على قلوبكم ..